உழைத்தார்கள் – உயர்ந்தார்கள்!
தந்தையின் கருவிகளுடன் விளையாடிய சிறுவன்... இன்று 32 பொறியியல் வல்லுநர்களை வழிநடத்தும் தொழில்முனைவோர்!
எளிய குடும்பத்தில் பிறந்து, ரூ.30,000 முதலீட்டில் தொழில் தொடங்கி, சர்வதேசத் தொழில்நுட்பச் சேவைத்துறையில் தடம் பதித்த இராஜகம்பள சமுதாய இளைஞர் ஜெயகணேஷின் உத்வேகமூட்டும் வெற்றிப்பயணம்!
“உங்கள் தொடக்கம் சிறியதாக இருக்கலாம்; ஆனால் உங்கள் சிந்தனையும் இலக்கும் ஒருபோதும் சிறியதாக இருக்க வேண்டியதில்லை!”
ஒரு சிறிய கிராமம்... எலக்ட்ரீசியன் தந்தையின் கருவிகளுடன் விளையாடிய சிறுவன்... பொறியாளராக வேண்டும் என்ற கனவு... அந்தக் கனவை நோக்கிய விடாமுயற்சி... கையில் இருந்தது வெறும் ரூ.30,000... எதிரே நின்றது உலகையே முடக்கிய கொரோனா பெருந்தொற்று!
இத்தனை தடைகளையும் கடந்து, இன்று 45 பொறியியல் வல்லுநர்கள் பணிபுரியும் Design Galaxy நிறுவனத்தை உருவாக்கி, இந்தியாவையும் தாண்டி வெளிநாட்டு நிறுவனங்களுக்கும் தொழில்நுட்பச் சேவைகளை வழங்கும் அளவிற்கு வளர்ந்திருக்கிறார் இராஜகம்பள சமுதாய இளைஞர் திரு. ஜெயகணேஷ்.
இது வெறும் ஒரு தொழில்முனைவோரின் வெற்றிக்கதை மட்டுமல்ல!
“என்னிடம் என்ன இருக்கிறது?” என்று மட்டும் கேட்காமல், “என்னிடம் இருப்பதை வைத்து என்ன செய்ய முடியும்?” என்று சிந்திக்கும் ஒவ்வொரு இளைஞருக்கும் நம்பிக்கையளிக்கும் வாழ்க்கைப் பாடம்!
தந்தையின் கருவிகளில் விதைக்கப்பட்ட கனவு!
கோவை மாவட்டம், பொள்ளாச்சி அருகேயுள்ள வக்காம்பாளையம் கிராமத்தைப் பூர்வீகமாகக் கொண்டவர் திரு. சுப்புராஜ். எலக்ட்ரீசியன் தொழில் செய்து வரும் இவருக்கும், திருமதி. மஞ்சுளா அவர்களுக்கும் மகனாகப் பிறந்தவர் ஜெயகணேஷ். இவருக்கு ஒரு சகோதரியும் உள்ளார்.
தந்தையின் கரம்பற்றி வளர்ந்த சிறுவன் ஜெயகணேஷுக்கு, அப்பா வேலைக்குப் பயன்படுத்தும் கருவிகளே விளையாட்டுப் பொருட்களாக அமைந்தன.
அந்தக் கருவிகளை வைத்து விளையாடும் குழந்தையைப் பார்த்து, “பெரிய இன்ஜினியராக வருவான் போல!” என்று குடும்பத்தினர் வேடிக்கையாகக் கூறுவது வழக்கம்.
மற்றவர்களுக்கு அது வேடிக்கையான பேச்சாக இருந்திருக்கலாம். ஆனால், அந்தச் சிறுவனின் மனதில் அது ஒரு கனவாக வேரூன்றியது.
தந்தையின் கருவிகள் அவருக்குள் தொழில்நுட்பத்தின் மீதான ஆர்வத்தைத் தூண்டின. அந்த ஆர்வம், பொறியாளராக வேண்டும் என்ற இலக்காக வளர்ந்தது.
ஒரு குழந்தையின் கையில் இருக்கும் சிறிய கருவி, அதன் மனதில் மிகப்பெரிய கனவை விதைக்கலாம். அந்தக் கனவை ஊக்குவிக்கும் ஒரு வார்த்தை, அதன் எதிர்காலப் பயணத்திற்கான முதல் படியாகவும் அமையலாம்.
இதோ, நம் முன்னால் ஒரு கேள்வி:
நமது குழந்தைகள் இன்று எதைப் பார்த்து வியக்கிறார்கள்? எதைப் பார்த்து ஆர்வம் கொள்கிறார்கள்? அவர்களுடைய அந்தச் சிறிய ஆர்வத்தை நாம் எவ்வாறு பெரிய இலக்காக வளர்க்கிறோம்?
பெற்றோர்களே! குழந்தைகளுக்குப் பெரிய கனவுகளைக் கொடுப்பதற்கு முன், அவர்களுடைய சிறிய கனவுகளைக் கேட்போம். அவர்களுடைய ஆர்வத்தை அடையாளம் காண்போம். அவர்களுக்குத் தேவையான ஊக்கத்தையும் வழிகாட்டுதலையும் வழங்குவோம்.
கனவு மட்டும் போதாது... அதற்கான பாதையும் வேண்டும்!
தனது சொந்தக் கிராமத்திலுள்ள அரசுப் பள்ளியில் நடுநிலைக் கல்வி வரை பயின்ற ஜெயகணேஷ், உயர்நிலைக் கல்விக்காகப் பொள்ளாச்சியிலுள்ள TMT Rukmaniammal Matriculation Higher Secondary School பள்ளியில் சேர்ந்தார்.
பள்ளிப்படிப்பை நிறைவு செய்த பின்னர், பொள்ளாச்சி நாச்சிமுத்து பாலிடெக்னிக் கல்லூரியில் மெக்கானிக்கல் துறையில் பட்டயப்படிப்பைத் தொடர்ந்தார்.
ஆனால், அவரது கனவு அத்துடன் முடிந்துவிடவில்லை.
பட்டயப்படிப்பு தனது பயணத்திற்கான அடித்தளமாக இருந்தாலும், இன்னும் உயரமான இலக்குகளை அடைவதற்குக் கூடுதல் தொழில்நுட்பக் கல்வி தேவை என்பதை உணர்ந்தார்.
தனது கனவுக்கு ஏற்ற கல்வியைத் தேர்ந்தெடுத்து, படிப்படியாகத் தனது தகுதியை வளர்த்துக்கொண்டார்.
இந்த இடத்தில் திருவள்ளுவர் கூறும் குறள் நமக்கு நினைவுக்கு வருகிறது:
எண்ணிய எண்ணியாங்கு எய்துப எண்ணியார்
திண்ணியர் ஆகப் பெறின் — திருக்குறள் 666
பொருள்: உறுதியான மனத்துடன் திட்டமிட்டு முயற்சி செய்பவர்கள், தாங்கள் எண்ணியதை எண்ணியபடியே அடைய முடியும்.
ஜெயகணேஷின் கல்விப் பயணத்தை இந்தக் குறளுடன் ஒப்பிட்டுப் பார்க்கலாம். பொறியாளராக வேண்டும் என்ற எண்ணம் அவரிடம் இருந்தது. அந்த எண்ணத்தை அடைவதற்கான கல்விப் பாதையைத் தேர்ந்தெடுத்தார். அடுத்தடுத்து தனது அறிவையும் தகுதியையும் வளர்த்துக்கொண்டார்.
“எனக்கு என்ன ஆக வேண்டும்?” என்ற கேள்விக்கு விடை காண்பது முதல் படி. “அதற்காக இன்று நான் என்ன செய்ய வேண்டும்?” என்ற கேள்விக்கான விடையைத் தேடுவதுதான் அடுத்த படி!
கனவு என்பது இலக்கின் தொடக்கம். திட்டமிடல் அதன் பாதை. செயல்பாடு அதன் பயணம்.
அர்ஜுனனின் இலக்குத் தெளிவும்... ஜெயகணேஷின் திட்டமிடலும்!
மகாபாரதத்தில் குரு துரோணர் தனது மாணவர்களின் இலக்குத் திறனைச் சோதிக்கும் நிகழ்வு குறிப்பிடத்தக்கது.
மரத்தின் மீது வைக்கப்பட்டிருந்த பறவையை நோக்கி அம்பு எய்யத் தயாரான மாணவர்களிடம், “உனக்கு என்ன தெரிகிறது?” என்று துரோணர் கேட்கிறார்.
மற்றவர்கள் மரம், கிளை, பறவை எனப் பலவற்றைக் கூறியபோது, அர்ஜுனன் பறவையின் கண்ணை மட்டுமே தனது இலக்காகக் கண்டதாக அந்த நிகழ்வு எடுத்துரைக்கிறது.
அந்தக் கதை நமக்கு உணர்த்துவது என்ன?
நாம் எதை அடைய விரும்புகிறோம் என்பதைத் தெளிவாக அறிந்துகொள்வது, அந்த இலக்கை நோக்கி நமது ஆற்றலை ஒருமுகப்படுத்த உதவுகிறது.
ஜெயகணேஷின் இலக்கும் தெளிவாக இருந்தது. பொறியியல் படிப்பை முடித்து ஒரு வேலையில் சேர்வது மட்டுமே அவரது கனவாக இருக்கவில்லை. எதிர்காலத்தில் தனக்கென ஒரு தொழில் நிறுவனத்தை உருவாக்க வேண்டும் என்பதே அவரது நோக்கமாக இருந்தது.
அந்த இலக்கை அடைவதற்குத் தேவையான அனுபவங்களைப் பெறுவதில் கவனம் செலுத்தினார்.
அதன்படி, கல்லூரி வகுப்புகளுக்குளோடு தனது கற்றலை நிறுத்திக்கொள்ளவில்லை. மாலை வேளைகளில் அருகிலிருந்த CAD Centre-இல் மாதம் ரூ.2,500 ஊதியத்தில் பயிற்றுநராகப் பணியாற்றினார்.
மாணவர்களுக்குக் கற்பித்துக்கொண்டே தானும் கற்றுக்கொண்டார். கல்வியறிவுடன் தொழில்நுட்ப அனுபவத்தையும் வளர்த்துக்கொண்டார்.
“கற்றது கைம்மண்ணளவு, கல்லாதது உலகளவு” என்ற ஔவையாரின் புகழ்பெற்ற கருத்து, அறிவைப் பெறுவதில் ஒருபோதும் நிறைவு இல்லை என்பதை ஜெயகணேஷ் கடந்துவந்த பாதை நினைவூட்டுகிறது.
கல்வி என்பது தேர்வில் மதிப்பெண் பெறுவதற்கான வழி மட்டுமல்ல; வாழ்க்கையில் நம்மை உயர்த்திக்கொள்ள உதவும் அறிவையும் திறனையும் வளர்த்துக்கொள்வதற்கான வாய்ப்பு என்பதை இளம் வயதிலேயே ஜெயகணேஷ் உணர்ந்திருந்தது அவரது வெற்றிக்கான வெளிச்சம்.
“நேரம் கிடைக்கும்போது கற்றுக்கொள்கிறேன்” என்று காத்திருப்பவர்களுக்கும், “எனது இலக்கை அடைவதற்காக நேரத்தை உருவாக்கிக் கற்றுக்கொள்கிறேன்” என்று செயல்படுபவர்களுக்கும் இடையிலான வேறுபாடுதான் பல நேரங்களில் வளர்ச்சியின் வேகத்தைத் தீர்மானிக்கிறது.
பதினைந்து வயதிலிருந்தே தனது கனவை நனவாக்குவதற்கான பாதையைத் தானே வகுத்துக்கொண்டதாகக் கூறப்படும் அவரது முயற்சி, இளைஞர்களுக்குப் பெரும் பாடம் என்றால் அதை மிகையென்றா சொல்லமுடியும்?.
சிறிய வேலை... பெரிய பாடம்!
வானூர்திப் பொறியியல் இறுதித் தேர்வை எழுதிய அடுத்த நாளே, தேர்வு முடிவுக்காகவோ மதிப்பெண் சான்றிதழுக்காகவோ காத்திருக்காமல், கோவையிலுள்ள Vinci Aqua Systems (P) Ltd, டர்பைன் உற்பத்தி நிறுவனத்தில் Design Engineer ஆகப் பணியில் சேர்ந்தார்.
அப்போது அவருக்குக் கிடைத்த மாத ஊதியம் ரூ.10,000.
ஒரு வேலையைத் தேர்ந்தெடுக்கும்போது, எவ்வளவு சம்பளம் கிடைக்கும் என்பதையே பலரும் முதன்மையாகக் கருதுகின்றனர்.
ஆனால், ஜெயகணேஷ் தனது பார்வையை ஊதியத்தில் மட்டும் செலுத்தவில்லை. தனது எதிர்காலத் தொழிலுக்குத் தேவையான அறிவு, அனுபவம், மனிதர்களைக் கையாளும் திறன் ஆகியவற்றை வளர்த்துக்கொள்ளும் வாய்ப்பாகவே ஒவ்வொரு பணியையும் அணுகினார்.
சிறிய நிறுவனத்தில் பணியாற்றுவதின் மூலம் வாடிக்கையாளர்களைக் கையாளுதல், தொழிலாளர்களுடன் இணைந்து செயல்படுதல், பொருட்களைக் கொள்முதல் செய்தல் போன்ற தொழிலின் நடைமுறைப் பரிமாணங்களைக் கற்றுக்கொள்ள முடியும் என்று நம்பினார்.
மூன்று ஆண்டுகள் அந்நிறுவனத்தில் பணியாற்றியது, ஒரு நிறுவனத்தின் செயல்பாடுகளைப் புரிந்துகொள்வதற்குப் போதுமான அறிவையும், அனுபவத்தையும் வழங்கியதாக ஜெயகணேஷ் உணர்ந்தபோது, அடுத்த பார்வை பெருநிறுவனங்கள் மீது திரும்பியது.
இதன் விளைவாக, பெருநிறுவனங்களின் செயல்பாட்டு முறைகளை அறிந்துகொள்ளும் நோக்கில் CAR SOFT GLOBAL PRIVATE LIMITED என்ற பன்னாட்டு நிறுவனமொன்றில் பணியில் சேர்ந்தார்.
இவ்வாறு சிறிய நிறுவனத்தின் நடைமுறை அனுபவத்தையும், பெருநிறுவனத்தின் செயல்பாட்டு அனுபவத்தையும் இணைத்துக்கொண்டார்.
திருவள்ளுவர் கூறுகிறார்:
அருமை உடைத்தென்று அசாவாமை வேண்டும்
பெருமை முயற்சி தரும் — திருக்குறள் 611
பொருள்: ஒரு செயல் கடினமானது என்று மனம் தளரக் கூடாது; தொடர்ந்து மேற்கொள்ளும் முயற்சியே பெருமையைத் தரும்.
ஒரு சிறிய நிறுவனத்தில் குறைந்த ஊதியத்தில் வேலை செய்வது சிலருக்கு முன்னேற்றமற்ற நிலையாகத் தோன்றலாம். ஆனால், அந்த அனுபவத்தைத் தனது எதிர்காலத் தொழிலுக்கான பயிற்சியாக மாற்றிக்கொண்டார் ஜெயகணேஷ்.
ஜெயகணேஷின் அணுகுமுறையில் இளைஞர்களுக்கு மறைந்துள்ள செய்தி இதுதான்:
முதல் வேலையின் சம்பளம் உங்கள் தற்போதைய வருமானத்தைச் சொல்லலாம்; ஆனால் அந்த வேலையில் நீங்கள் கற்றுக்கொள்ளும் திறன்கள் உங்கள் எதிர்கால வாய்ப்புகளை விரிவுபடுத்தலாம்.
வேலையைத் தேர்ந்தெடுக்கும்போது ஊதியத்துடன் சேர்த்து, “இங்கு நான் என்ன கற்றுக்கொள்வேன்? என்ன திறனை வளர்த்துக்கொள்வேன்? இந்த அனுபவம் என் இலக்கிற்கு எவ்வாறு உதவும்?” என்றும் சிந்தியுங்கள்.
ரூ.30,000... ஆனால் கனவின் மதிப்பு அளவிட முடியாதது!
சகோதரியின் திருமணம் முடிந்த பின்னர், தனது சொந்தத் தொழிலைத் தொடங்க வேண்டும் என்று ஜெயகணேஷ் முன்பே தீர்மானித்திருந்தார்.
அந்த நேரத்தில் அவரிடம் இருந்தவை, கார்ப்பரேட் நிறுவனத்தில் பணியாற்றிப் பெற்ற இரண்டு ஆண்டு அனுபவமும், கையிருப்பாக இருந்த ரூ.30,000 மட்டுமே.
ஒருபுறம், சொந்தமாக ஒரு நிறுவனத்தை உருவாக்க வேண்டும் என்ற கனவு. மறுபுறம், அதற்கான குறைந்த முதலீடு.
ஆனால், கையிருப்பில் இருந்த தொகையை மட்டும் பார்த்து தனது கனவைக் கைவிட அவர் விரும்பவில்லை.
2020-ஆம் ஆண்டு, Design Galaxy என்ற பெயரில் தனது நிறுவனத்தைத் தொடங்கினார்.
ஒரு மேசை, ஒரு கணினி, அலுவலகத்திற்கான முன்பணம் என மிக எளிமையான வசதிகளுடன், நிறுவனத்தின் ஒரே பணியாளராகத் தனது பயணத்தைத் தொடங்கினார்.
பெரிய அலுவலகம் இல்லை. பெரிய பணியாளர் குழு இல்லை. பெரும் முதலீடும் இல்லை.
ஆனால், தனக்கென ஒரு நிறுவனத்தை உருவாக்க வேண்டும் என்ற கனவும், அதற்கான அனுபவமும், செயல்பட வேண்டும் என்ற உறுதியும் இருந்தன.
இங்கு திருவள்ளுவரின் மற்றொரு குறள் பொருத்தமாக அமைகிறது:
வெள்ளத்தனைய மலர்நீட்டம் மாந்தர்தம்
உள்ளத் தனையது உயர்வு — திருக்குறள் 595
பொருள்: நீரின் ஆழத்திற்கு ஏற்ப தாமரைத் தண்டின் உயரம் அமைவது போல, மனிதர்களின் உயர்வும் அவர்களின் உள்ளத்தின் உயர்வைப் பொறுத்தது.
இந்தக் குறளைப் பொருளாதார வசதிகளைக் குறைத்து மதிப்பிடுவதற்காக அல்ல; ஒருவருடைய இலக்கையும் சிந்தனையையும் தொடக்கநிலை மட்டுமே கட்டுப்படுத்திவிடக் கூடாது என்பதை உணர்த்துவதற்காக இங்கு நினைவுகூரலாம்.
“என்னிடம் பெரிய முதலீடு இல்லை” என்பது ஒரு சூழ்நிலை. “என்னிடம் இருக்கும் திறனை வைத்து எப்படித் தொடங்குவது?” என்பது ஒரு புதிய சிந்தனை!
உங்கள் கனவைத் தொடங்குவதற்கு முன் எல்லா வசதிகளும் கிடைக்க வேண்டும் என்று காத்திருக்கிறீர்களா?
திட்டமிடுங்கள். தேவையான திறன்களைப் பெறுங்கள். சாத்தியமான சிறிய அடியை எடுத்து வையுங்கள். உங்கள் சூழ்நிலைக்கேற்ற வழியைத் தேடுங்கள்.
சிறிய தொடக்கம் என்பது சிறிய எதிர்காலத்திற்கான தீர்ப்பு அல்ல! என்பது தான் இதில் நாம் கற்றுக்கொள்ளும் செய்தி.
உலகம் முடங்கியபோது... வாய்ப்பைத் தேடியவர்!
ஒரு தொழில் தொடங்குவது சவால் என்றால், தொழில் தொடங்கிய சில காலத்திலேயே உலகையே முடக்கிய பெருந்தொற்றை எதிர்கொள்வது எத்தகைய சவாலாக இருக்கும்?
2020-ஆம் ஆண்டு கொரோனா பெருந்தொற்று உலகின் இயல்பான செயல்பாடுகளைப் பெருமளவில் பாதித்தது. புதிதாகத் தொடங்கிய Design Galaxy நிறுவனத்திற்கும் அது ஒரு பெரிய சவாலாக அமைந்தது.
ஆனால், ஜெயகணேஷ் சூழ்நிலையைப் பார்த்து முடங்கிவிடவில்லை.
பல தொழில்கள் முடங்கியிருந்த அந்தச் சூழலில், புதிதாகத் தொடங்கிய நிறுவனம் எவ்வாறு தொடர்ந்து செயல்பட முடியும்?
இந்தக் கேள்விக்கு விடை தேடுவதிலேயே ஜெயகணேஷின் தொழில்முனைவோர் சிந்தனை வெளிப்பட்டது.
“எல்லா வழிகளும் அடைபட்டுவிட்டனவா? அல்லது நான் இன்னும் கண்டுபிடிக்காத ஒரு வழி இருக்கிறதா?” என்று சிந்தித்தார்.
உலகம் முழுவதும் முடங்கியிருந்தாலும், யார் இயங்கிக்கொண்டிருக்கின்றார்கள் என்ற தேடலின் முடிவில் அரசு நிர்வாகம் மட்டுமே முழுவீச்சில் முன்பைவிட சுறுசுறுப்பாக இயங்கிக் கொண்டிருப்பதைக் கண்டறிந்தார்.
அரசுத் திட்டங்களுக்கான பணிகள் எங்கு நடைபெறுகின்றன? அவற்றைச் செயல்படுத்துவதில் யார் ஈடுபட்டுள்ளனர்? தனது நிறுவனத்தின் தொழில்நுட்பத் திறனை எங்கு பயன்படுத்த முடியும்? என வாய்ப்புகளைத் தேடினார்.
சவால்கள் இல்லாத வாழ்க்கை வெற்றியைத் தருவதில்லை; சவால்களை எதிர்கொண்டு கற்றுக்கொள்வதன் மூலமே புதிய வாய்ப்புகளை உருவாக்க முடியும்.
அந்தத் தேடலின் மூலம் சென்னையைச் சேர்ந்த ஒரு பிரபல பொறியியல் கல்லூரி அரசிடமிருந்து பெற்றிருந்த திட்டத்தை அறிந்துகொண்டார். கொரோனா பெருந்தொற்றின் காரணமாக அந்தத் திட்டத்தைச் செயல்படுத்துவதில் அந்நிறுவனம் சிரமத்தை எதிர்கொண்டிருந்தது.
அந்தத் திட்டத்திற்குத் தேவையான இயந்திர வடிவமைப்புப் பணிகளில் Design Galaxy பங்களிக்க வாய்ப்பு கிடைத்தது.
இதன் தொடர்ச்சியாக, Senior Research Fellow என்ற அங்கீகாரத்துடன் கைவினைக் கலைஞர்களின் உற்பத்தித் திறனை மேம்படுத்துவதற்கான இயந்திரங்களை வடிவமைக்கும் பணியில் ஈடுபட்டார்.
இந்த வாய்ப்பு, கைவினைக் கலைஞர்களின் உற்பத்தித் திறனை மேம்படுத்துவதற்குப் பயன்பட்டதுடன், Design Galaxy நிறுவனத்தின் வளர்ச்சிக்கும் புதிய பாதையைத் திறந்தது.
திருவள்ளுவர் கூறும் முயற்சியின் சிறப்பை இங்கு நினைவுகூரலாம்:
தெய்வத்தான் ஆகா தெனினும் முயற்சிதன்
மெய்வருத்தக் கூலி தரும் — திருக்குறள் 619
பொருள்: ஊழால் ஒரு செயல் கைகூடாமல் போனாலும், ஒருவர் மேற்கொண்ட உண்மையான முயற்சி அதற்குரிய பலனைத் தரும்.
ஜெயகணேஷின் அனுபவம் நமக்கு உணர்த்துவது, சவால்கள் வந்தால் அவற்றை மறுப்பதோ, அவற்றைப் பற்றியே சிந்தித்துக்கொண்டிருப்பதோ வளர்ச்சிக்கான ஒரே வழியல்ல என்பதுதான்.
சூழ்நிலையைப் புரிந்துகொண்டு, நமக்குள்ள திறன்களை அடையாளம் கண்டு, புதிய வாய்ப்புகளைத் தேடுவதும் தொழில்முனைவோர் சிந்தனையின் ஒரு பகுதியாகும்.
“வாய்ப்பு கிடைக்கவில்லை” என்று காத்திருப்பதைவிட, “எனது திறனுக்கான வாய்ப்பு எங்கே இருக்கிறது?” என்று தேடத் தொடங்குங்கள்!
அனுமன் உணர்ந்த ஆற்றல்... நாம் உணர வேண்டிய திறன்!
இராமாயணத்தில், சீதையைத் தேடிச் செல்லும் பணியில் அனுமனின் ஆற்றல் வெளிப்படும் நிகழ்வுகள் முக்கியமானவை.
கடலைக் கடந்து செல்ல வேண்டிய சூழலில், தன்னுள் இருக்கும் ஆற்றலை அனுமன் உணர்ந்து செயல்படுவதற்கு ஜாம்பவானின் ஊக்கம் துணையாக அமைவதாகக் கதை எடுத்துரைக்கிறது.
இந்த நிகழ்வை ஒரு வாழ்வியல் எடுத்துக்காட்டாகப் பார்க்கும்போது, நமக்குள் இருக்கும் திறனை அடையாளம் காண்பதன் முக்கியத்துவம் வெளிப்படுகிறது.
ஜெயகணேஷின் பயணத்திலும் தனது திறனைத் தொடர்ந்து வளர்த்துக்கொள்ளும் மனப்பான்மை காணப்படுகிறது.
கல்லூரியில் கற்ற தொழில்நுட்பம், CAD Centre-இல் பெற்ற அனுபவம், சிறிய நிறுவனத்தில் கற்ற நடைமுறைகள், பெருநிறுவனத்தில் பெற்ற அனுபவம் என ஒவ்வொரு கட்டத்திலும் தனது திறனை வளர்த்துக்கொண்டார்.
தனது திறனை அறிந்துகொள்வதுடன், அதை எங்கு பயன்படுத்தலாம் என்பதையும் தேடினார்.
உங்களுக்குள் என்ன திறன் இருக்கிறது என்பதை மற்றவர்கள் கண்டுபிடிக்கும் வரை காத்திருக்காதீர்கள். நீங்களே உங்களைக் கண்டறியுங்கள்!
ஒரு திறன் உங்களிடம் இருக்கிறது என்பதைக் கண்டறிவது தொடக்கம். அதைத் தொடர்ந்து பயிற்சியால் வளர்ப்பது அடுத்த கட்டம். அந்தத் திறனைப் பிறருக்குப் பயனுள்ளதாக மாற்றுவது அதன் முழுமை. இது தான் ஜெயகணேஷ் பெற்ற ஞானம்.
தனி ஒருவரின் கனவு... 45 பேரின் தொழில் பயணம்!
முதற்கட்டச் சவால்களைக் கடந்து வளர்ச்சிப் பாதையில் பயணிக்கத் தொடங்கிய Design Galaxy, இன்று இயந்திரவியல் தொழில்துறைக்கான வடிவமைப்பு மற்றும் மேம்பாட்டுச் சேவைகளை வழங்கும் நிறுவனமாக வளர்ந்துள்ளது.
Defence, Aerospace, Automobile, Agricultural மற்றும் SPM (Special Purpose Machine), Kitchen Equipment உள்ளிட்ட பல்வேறு துறைகளுக்குத் தேவையான பொறியியல் வடிவமைப்பு மற்றும் மேம்பாட்டுச் சேவைகளை நிறுவனம் வழங்கி வருகிறது.
இந்தியாவைத் தாண்டி அமெரிக்கா, துபாய், ஆஸ்திரேலியா உள்ளிட்ட வெளிநாடுகளிலுள்ள நிறுவனங்களுக்கும் சேவைகளை வழங்கும் அளவிற்கு அதன் செயல்பாடுகள் விரிவடைந்துள்ளன.
2020-ஆம் ஆண்டு தனி ஒருவராகத் தொடங்கிய நிறுவனத்தில், இன்று 45 பொறியியல் வல்லுநர்கள் பணிபுரிகின்றனர்.
இந்த வளர்ச்சி நமக்கு ஒரு முக்கியமான உண்மையை நினைவூட்டுகிறது:
ஒரு மனிதரின் கனவு, அவருடைய உழைப்பால் ஒரு நிறுவனமாக வளரலாம்; அந்த நிறுவனம் பலருடைய திறன்களையும் உழைப்பையும் இணைக்கும் தளமாக மாறலாம்.
ஒருவர் தனக்காக வேலை தேடுவது ஒரு இலக்கு. தனக்கென வேலைவாய்ப்பை உருவாக்குவது இன்னொரு இலக்கு. மற்றவர்களுக்கும் வேலைவாய்ப்புகளை உருவாக்கும் நிறுவனத்தை உருவாக்குவது மேலும் விரிவான பொறுப்பை ஏற்கும் முயற்சி.
ஜெயகணேஷின் நிறுவன வளர்ச்சியில் இந்த மாற்றத்தைக் காண முடிகிறது.
வெற்றியைப் பகிர்ந்துகொள்ளும் எண்ணம்!
தொழில் வளர்ச்சி என்பது ஒரு நிறுவனத்தின் வருமானம் அல்லது பணியாளர் எண்ணிக்கையுடன் மட்டும் முடிந்துவிடுவதில்லை.
அந்த நிறுவனம் உருவாக்கும் அறிவு, திறன், வாய்ப்புகள் ஆகியவை அடுத்த தலைமுறைக்கும் பயன்படும்போது அதன் சமூகப் பங்களிப்பு விரிவடைகிறது.
இந்த நோக்கில், கோவையிலுள்ள 20-க்கும் மேற்பட்ட முன்னணி கல்லூரிகளுடன் புரிந்துணர்வு ஒப்பந்தங்கள் (MoU) மேற்கொண்டு, மாணவர்களுக்குத் திறன் மேம்பாட்டுப் பயிற்சிகளை Design Galaxy வழங்கி வருகிறது.
மேலும், பொருளாதாரத்தில் பின்தங்கிய இளைஞர்களுக்குப் பொறியியல் சார்ந்த பயிற்சிகளை இலவசமாக வழங்கி, அவர்களுக்கு Design Engineer பணிவாய்ப்புகளைப் பெற்றுத்தர வேண்டும் என்பதையும் ஜெயகணேஷ் தனது நிறுவனத்தின் கொள்கை நோக்கங்களில் ஒன்றாகக் கொண்டுள்ளார்.
இராஜகம்பள சமுதாய இளைஞர்கள் தங்களது எதிர்கால வேலைவாய்ப்பு அல்லது சுயதொழில் பாதையைத் தேர்ந்தெடுப்பதற்கான விழிப்புணர்வை ஏற்படுத்த வேண்டும் என்ற விருப்பத்தையும் அவர் வெளிப்படுத்தியுள்ளார்.
திருவள்ளுவரின் மற்றொரு குறள் இங்கு பொருத்தமாக அமைகிறது:
பயன்தூக்கார் செய்த உதவி நயன்தூக்கின்
நன்மை கடலின் பெரிது — திருக்குறள் 103
பொருள்: ஒருவர் செய்த உதவியின் பயனை அளவிட்டுப் பார்க்காமல், அதன் நன்மையை எண்ணிப் பார்த்தால், அது கடலைவிடப் பெரியதாக இருக்கும்.
இந்தக் குறள், பிறருக்கு உதவுவதன் மதிப்பை எடுத்துரைக்கிறது. ஜெயகணேஷின் பயணத்தில் மாணவர்களுக்குத் திறன் மேம்பாட்டுப் பயிற்சி வழங்குவதும், பொருளாதாரத்தில் பின்தங்கிய இளைஞர்களுக்கு வாய்ப்புகளை உருவாக்க வேண்டும் என்ற எண்ணமும் இந்தச் சிந்தனையுடன் தொடர்புபடுத்திப் பார்க்கத்தக்கவை.
நாம் உயர்வது நமது முயற்சியின் பலன்; நம்முடன் இன்னொருவரும் உயர்வதற்கான வாய்ப்பை உருவாக்குவது நமது வளர்ச்சியின் சமூகப் பயன்!
உழைப்புக்குக் கிடைத்த அங்கீகாரங்கள்!
ஜெயகணேஷின் தொழில் வளர்ச்சிக்கும் உழைப்புக்கும் பல்வேறு அங்கீகாரங்கள் கிடைத்துள்ளன.
Indian Forum Awards நிறுவனம், 2025-ஆம் ஆண்டு ஜெயகணேஷுக்கு “Entrepreneur of the Year 2025” என்ற விருதை வழங்கிக் கௌரவித்தது.
5 செப்டம்பர் 2026 இல் Trade India நிறுவனம் சார்பில் சென்னையிலுள்ள The Residency Towers-இல் நடைபெற்ற விழாவில் "Innovation & Excellence in Design Industries" என்ற விருதை Design Galaxy நிறுவனத்திற்கு வழங்கி ஜெயகணேஷை கௌரவித்தது.
