விழித்துக்கொண்டோரெல்லாம் பிழைத்துக்கொண்டார்! - தூத்துக்குடியில் விழித்துக்கொண்ட கம்பளத்தான்!

வன்னியர் இடஒதுக்கீட்டால் பாதிக்கப்பட்ட 115 சமூகங்களில், பலசமூகங்களுக்கு இடஒதுக்கீட்டின் முக்கியத்துவம், அவசியம் குறித்து போதிய விழிப்புணர்வு இல்லாமல் இருந்த காரணத்தால் இச்சட்டம் கொண்டுவரப்பட்டபொழுது முக்குலத்தோர் சமுதாயம் மட்டும்தான் பெரிய அளவில் போராட்டங்களை முன்னெடுத்து, அதிமுக அரசுக்கு எதிராக தீவிரமாக தேர்தல் பிரச்சாரத்திலும் ஈடுபட்டனர். இப்போராட்டங்கள் தேர்தலோடு முடிந்துவிடும் என்று அரசியல் விமர்சகர்கள் எதிர்பார்த்தவேளையில் கொஞ்சம் கொஞ்சமாக பிற சமுதாயங்களை இணைக்கும்பணியினை சீர்மரபினர் நலச்சங்கம் ஈடுபட்டது.

சீர்மரபினர் நலச்சங்கத்தின் இம்முயற்சிக்கு பலன்கிடைத்துள்ளது. இதன்விளைவாக மிகவும் பிற்படுத்தோர் பட்டியலிலுள்ள 115 சமுதாயங்கள் மட்டுமல்லாமல் பிற்படுத்தப்பட்ட அமைப்புகளும் கூட இந்த இடஒதுக்கீட்டை எதிர்த்து சீர்மரபினர் நலச்சங்கத்தோடு கைகோர்த்துள்ளன. பிற்படுத்தப்பட்ட-மிகவும் பிற்படுத்தப்பட்ட சமுதாயங்கள் இணைந்து சமூகநீதிக்கூட்டமைப்பை உருவாக்கி கடந்த இருமாதங்களாக கூட்டாக செயல்பட்டு வருகின்றனர்.

இக்கூட்டமைப்பில் இணைந்துள்ள வண்ணார், நாவிதர், ஆண்டிப்பண்டாரம், இசைவேளாளர், மீனவர் உள்ளிட்ட கல்வியிலும், வேலைவாய்ப்பிலும், பொருளாதாரத்திலும் தொட்டிய நாயக்கர் சமூகத்தைவிட பின்தங்கிய நிலையிலுள்ள போதிலும் இடஒதுக்கீட்டின் தேவையை உணர்ந்துள்ளவர்களாக ஆர்வத்துடனும், அர்ப்பணிப்புடனும் போராட்டகளங்களில் ஈடுபட்டு வருகின்றனர்.

இப்பிரச்சினையில் நாமக்கல் தவிர்த்த பிற மாவட்டங்களிலுள்ள தொட்டிய நாயக்கர் சமுதாயத்தினர் அக்கறையின்றி இருந்தநிலையில், நேற்று தூத்துக்குடியில் நடைபெற்ற போராட்டத்தில் தொட்டிய நாயக்கர் சமூகத்தினர் கலந்துகொண்டிருப்பது சமூகநீதி கூட்டமைப்பில் உள்ள பிற சமுதாயத்தினருக்கு மகிழ்ச்சியை ஏற்படுத்தியுள்ளது. இப்போராட்டத்தில் த.வீ.க.பண்பாட்டுக்கழகத்தின் மாவட்ட தலைவர் வலசை கண்ணன், வீரபாண்டிய கட்டபொம்மன் தேசிய கழகத்தின் தலைவர் மூலக்கரை.நடராஜன் ஆகியோர் தலைமையில் பத்திற்கும் மேற்பட்டோர் கலந்துகொண்டனர்.